အရက်သမား ထွန်းဖေ
မြိုင်သာယာရပ်ကွက်မှာတော့ ထွန်းဖေဆိုလျင် မသိသူမရှိလောက်သည်အထိ ရပ်ကျော်ရွာကျော်သတင်းမွှေးသူဖြစ်သည်။ ကောင်းသတင်းတော့မဟုတ်၊ နာမည်ရှေ့မှာ အရက်သမားကပ်၍ “အရက်သမား ထွန်းဖေ”ဟူ၍ ထင်ပေါ်ခြင်းဖြစ်သည်။ ထွန်းဖေ အရက်ကြိုက်တတ်ပုံကလဲ မိုးလင်းမျက်စိနှစ်လုံးပွင့်သည်နှင့် အရက်နှင့်မျက်နာသစ်ပြီး မိုးချုပ်အိပ်ရာဝင်တော့လဲ အရက်ပုလင်းဖက်အိပ်တတ်သူ၊ သို့သော် မူးလာလျင် တခြားအရက်သမားတွေလိုဆူပူသောင်းကျန်းခြင်းမရှိ၊ သူ့ဘာသာ အေးဆေးနေပြီးအိမ်ပြန်အိပ်နေတတ်သည်။ မမူးသည့်အချိန်တွေမှာတော့ ရပ်ရွာအလှူပွဲများ သာရေးနာရေးရှိလျင်ရေခပ် ထင်းခွဲ ပန်းကန်ဆေး စသည်ဖြင့် အားတက်သရော ပါဝင်ကူညီပေးတတ်သောကြောင့် အရက်သမားဖြစ်၍ မပတ်သက်ချင်ကြသော်လဲ ရပ်ရွာက ထွန်းဖေကိုပစ်ပယ်မထား၊ အထိုက်အလျောက် ခေါ်ပြောဆက်ဆံကြသည်။ အသားအရည်က နေလောင်ထား၍ နီစပ်စပ်၊ အရပ်က မနိမ့်မမြင့်၊ မဖြီးမသင်သည့်အတွက် ဆံပင်ရှည်ကြီးတွေနှင့်နူတ်ခမ်းမွှေးတွေက သူ့မျက်နာမှာ မမြင်ချင်မှအဆုံး..၊ အဝတ်အစားဟူ၍လဲမဝတ်တတ်၊ တဘက်ရှည်တထည် ပခုံးပေါ်တင်ပြီး အောက်ပိုင်းမှာတော့ ပုဆိုးတစ်ထည်ကိုသာတိုတိုတုတ်တုတ်ဝတ်ထားသည့် ထွန်းဖေရယ်ပါ။ ကိုထွန်းဖေ အိမ်က ရပ်ကွက်အစွန်မှာဖြစ်သည်။ မိဘများကမရှိကြတော့၊ ဆွေမျိုးဆို၍ […]
